Алкалоид уште еднаш ја демонстрира својата доминација на домашната сцена, откако во рамките на петтото коло од Суперлигата оствари убедлив триумф над Прилеп со резултат 47-21. За тимот предводен од Кирил Лазаров ова е најубедливата победа во досегашното суперлигашко учество.
„Фармацевтите“ уште од самиот старт го наметнаа своето темпо и на полувреме заминаа со двоцифрена предност од 23-10. Во вториот дел продолжија со висок ритам, користејќи ја широката ротација и агресивната одбрана, па до крајот само ја зголемуваа разликата. Најефикасен стрелец беше Емилијан Ѓоргоски со осум погодоци, а меѓу најзаслужните за убедливиот резултат беше и голманот Марко Кизиќ, кој запиша десет интервенции.
Кај Прилеп најдобри стрелци беа Денис Шабановиќ со четири од четири, а пак Божидар Лековиќ имаше четири погодоци од седум обиди.
Со оваа победа Алкалоид ја запиша својата трета победа во сезоната. Во следното коло тимот гостува во Куманово, додека Прилеп ќе има задача за поправен впечаток на домашен терен против Струга.
