Ракометарите на ГРК Охрид ја потврдија добрата форма во Суперлигата, совладувајќи го составот на Тиквеш со 24-19 во натпревар од петтото коло. Со овој триумф охриѓани стигнаа до третата сезонска победа и остануваат во горниот дел на табелата.
„Гладијаторите“ уште од самиот почеток го наметнаа своето темпо и за десетина минути имаа убедливо водство од 7-1. Играта во првиот дел беше речиси безгрешна, па на пауза заминаа со двоцифрена предност (15-5).
Тиквеш во вториот дел заигра многу подобро и успеа да ја намали негативата, во еден момент дури и на четири гола, но немаа сили за целосен камбек.
Најдобри стрелци во победничкиот табор беа Лиапис со пет и Цирар со четири погодоци, додека голманите Чаневски и Блажески заедно собраа осум одбрани. Кај гостите од Кавадарци најдобар беше голманот Печурица со 13 интервенции, а Коцев постигна пет голови.
Охрид со оваа победа добива дополнителна самодоверба пред дербито во Битола против актуелниот шампион Еурофарм Пелистер, додека Тиквеш во следното коло ќе гостува кај вториот тим на битолчани.
