Реми во Мешеишта, пораз за Караорман, Влазними славеше во меч со осум гола!

Денес се одиграа натпреварите од 2. коло во Трета лига – Југозапад, а два натпревари завршија без победник, додека најмногу возбуди имаше во Струга, каде што беа постигнати вкупно осум погодоци.

Во Мешеишта, Славеј и Кораб одиграа 1:1. Домашниот тим поведе во првото полувреме со голот на Никола Секулоски, но во вториот дел Адем Колоња донесе израмнување за гостите. Славеј од 57. минута играше со човек помалку, бидејќи искусниот Секулоски беше исклучен од игра.

Големо изненадување приреди новиот третолигаш Напредок, кој на домашен терен во Ношпал го совлада некогашниот второлигаш Караорман со 2:1. Владе Јанакиевски го отвори резултатот во 41. минута, а на стартот од вториот дел Филип Кебаковски зголеми на 2:0. Гостите од Струга успеаја да го ублажат поразот преку Лука Богданоски во 73. минута.

Могила и Света Троица одиграа возбудлив натпревар со четири погодоци и реми 2:2. Охриѓани поведоа со два гола во првото полувреме преку Никола Миткоски и Хадис Сулејмани, но во продолжението Хакан Алимоски намали од белата точка, а Антонио Спировски во 60. минута израмни за домаќините.

Најголемата голеада се одигра во Струга, каде Влазними со убедливи 5:3 ја совлада Велешта. До полувреме домаќините имаа три гола предност преку Ерјон Амети, Денис Шадов и Аљтин Лога. Во вториот дел се запишаа и Рејхан Џелеши и Рехан Барајмоски. За гостите погодија Елмаз Шеи, Диели Каба и Едон Речи.

Кравари славеше домашна победа од 3:1 над Демир Хисар со комплетен пресврт. Гостите поведоа преку Аце Јанкуловски во 38. минута, но веќе по три минути Јовица Христовски израмни на 1:1. Во второто полувреме Темур Емини и Петар Јанкуловски ја потврдија победата на Кравари.