Новата сезона во Трета лига – Југ донесе погодоци на сите натпревари од првото коло, но на самиот старт од сезоната екипата на Слога од Лажани се откажа од натпреварување, а во рамки на првото коло слободна беше екипата на Башкими од Јаболчиште.
Превалец на убедлив и импресивен начин ја отвори новата сезона и најави дека ќе атакува на првото место кое води кон бараж за Втор алига откако на домашен терен со убедливи 6:0 го декласираше составот на Млекар, кој е новак во лигата.
Кристијан Маневски постигна три гола, а по еден постигнаа Александар Јордановски, Марјан Стефановски и Димче Ставревски.
Тешко се освојува Крушево, екипата на Питу Гули со „петарда“ го декласираше Дреново (5:0): Унча Бојаџиески беше двоен стрелец, а по еден гол постигнаа Ѓорѓи Стрезовски, Оливер Велевски и Даниел Нечовски.
Во Кривогаштани паднаа четири погодоци за дебакл на Младост на стартот од новата сезона, откако Ултрас лесно прокнижи три бода. Бобан Тошески беше двоен стрелец, а по еден гол постигнаа Дарио Наумовски и Дино Варошаноски.
Бучин со голот на Виктор Глушески во 33. минута славеше минимална победа од 1:0 над Венец од Долни Дисан.
Влазними Јуниор го слави Самир Салиу бидејќи со неговите два погодоци тимот славеше победа од 2:0 над новиот третолигаш Тополка.
Бојан Миланов го реши натпреварот меѓу Росоман и Борец, за минимална победа на домашниот тим од 1:0.
