Младиот фудбалски талент, 20-годишниот Мартин Ѓоргиевски, ја продолжува својата кариера во Чешка. Играчот за врска потпиша повеќегодишен договор со второлигашот Збројовка Брно, каде ќе се обиде да направи чекор напред во својата професионална кариера.
Ѓоргиевски е производ на младинската школа на Академија Пандев (Брера Струмица) и на само 16 години го имаше своето деби во ПМФЛ, што го прави еден од најталентираните млади играчи во Македонија. Во текот на пет сезони за струмичкиот клуб одигра 84 натпревари, постигна 13 гола и запиша 12 асистенции, а со својата креативност и играчки квалитети се истакна како клучен член на тимот.
Покрај клубските успеси, Ѓоргиевски е и стандарден член на македонската репрезентација до 21 година, а претходно ги помина сите младински категории од У16 до У21, покажувајќи континуиран напредок и конзистентност на национално ниво. Со овој трансфер, Ѓоргиевски добива шанса да се докаже и на меѓународната сцена, а со тоа и да го зголеми својот потенцијал за идни повици во сениорската репрезентација на Македонија.
