Женската фудбалска репрезентација на Македонија до 17 години денеска во Италија го отвори пријателскиот турнир со натпревар против домашната селекција. Покрај Македонија и Италија, на турнирот учествуваат и Словенија и Република Ирска.
Избранките на селекторката Катерина Милеска одиграа дисциплинирано и борбено, но беа поразени со 2:0. Италијанките ги постигнаа погодоците во 30. и 75. минута. Дополнителен проблем за Македонија беше исклучувањето на голманката Евгенија Вељановска во 43. минута, по што нашата селекција повеќе од едно полувреме играше со играч помалку.
И покрај тоа, младите фудбалерки покажаа карактер и борбеност за националниот дрес, успевајќи да одржат рамнотежа и да спречат повисока победа на фаворизираната Италија.
Наредниот предизвик за Македонија е утрешниот дуел против Република Ирска, кој ќе започне од 17 часот.
Пријателскиот турнир во Италија претставува подготовка за квалификацискиот турнир – рунда 1 за пласман на Европското првенство до 17 години. Од 23 до 29 октомври, Македонија ќе игра во Хрватска, во група со домаќинот, Италија и Финска.
