Македонскиот одбојкарски репрезентативец, 36-годишниот Александар Љафтов, во новата сезона ќе настапува за тимот на Бурган Спорт Клуб од Кувајт. Искусниот примач, кој е еден од носителите на играта во нашиот национален тим, се реши за нов предизвик на Блискиот Исток.
Љафтов има богато интернационално искуство. На клупски план, тој настапуваше за Работнички, Галатасарај, Рибница Краљево, Анагениси Деринеиас, Саут Гас Спортинг, ПТТ Анкара, Младост Рибола Каштела, Хебар Пазарџик, Равена, Ал Ибтисам, Ал-Васл и Струмица, а минатата сезона беше дел од ПАОК. Со тоа, Љафтов зад себе има импресивна кариера во неколку европски и блискоисточни шампионати.
Минатата сезона, Бурган Спорт Клуб заврши на второто место во кувајтскиот шампионат, а во новата сезона амбициите се уште поголеми – напад на титулата. Со доаѓањето на Љафтов, клубот добива значајно засилување со искуство и квалитет.
Паралелно со настапите за својот нов клуб, Љафтов ќе ја темпира формата и за претстојното Европско првенство 2026, кое ќе се одржи од 9 до 27 септември во Италија, Финска, Бугарија и Романија. Нашата репрезентација на 4 октомври оваа година во италијанскиот град Бари ќе ги дознае противниците во групната фаза.
