Фудбалскиот клуб Работнички назначи нов шеф на стручниот штаб – турскиот стратег Алпарслан Ердем. Одлуката доаѓа само два дена по разделбата со Бојан Маркоски, кој го напушти клубот поради слабите резултати на стартот од сезоната.
Ердем потпиша договор до крајот на тековната сезона со можност за продолжување на соработката. Турскиот стручњак не е непознато име за македонскиот фудбал – минатата сезона го водеше тимот на Шкупи, што му овозможува добро познавање на Првата македонска фудбалска лига и нејзините конкуренти.
Како фудбалер, Ердем има богата кариера настапувајќи за екипи како Вердер Бремен, Галатасарај, Генчлербирлиги, Истанбул Башакшехир и Фатих Карагумрук. Во тренерската кариера, работеше како помошник на Франческо Фариоли и Андреа Пирло во Карагумрук, а во 2023 година го презеде тимот како главен тренер.
Работнички минатата сезона заврши на третата позиција во првенството и обезбеди настап во квалификациите за Конференциската лига, но стартот на новата сезона беше под очекувањата – по три одиграни кола, тимот има само еден бод и сè уште нема постигнато гол.
Со доаѓањето на Ердем, „романтичарите“ се надеваат на пресврт и подобри резултати, како во домашното првенство, така и во европските настапи.
