Македонскиот шампион Шкендија за првпат во клупската историја ќе игра во групната фаза на Конференциската лига, а ждрепка во Монако ги одреди противниците на тетовскиот клуб за есенската европска авантура.
Избраниците на Јетон Беќири ќе се соочат со шест ривали: Слован Братислава, Рајо Ваљекано, Јагјелонија, Дрита од Косово, Шелбурн од Ирска и АЕК Ларнака. Сите домашни натпревари Шкендија ќе ги одигра на Националната Арена „Тодор Проески“ во Скопје, а точниот распоред на натпреварите ќе го објави УЕФА во недела.
Тетовчани ќе имаат сериозни предизвици, особено против фаворитите од првиот, вториот и третиот шешир – Слован Братислава, Рајо Ваљекано и Јагјелонија. Сепак, според анализите, реални шанси за освоени бодови постојат во дуелите со Дрита, Шелбурн и АЕК Ларнака, каде што Шкендија ќе бара максимален ефект.
Според проекциите, за пласман во нокаут-фазата ќе бидат потребни најмалку шест до седум бода и солидна гол-разлика. Првите осум екипи од групната фаза обезбедуваат директен пласман во осминафинале, додека тимовите од 9. до 24. место ќе играат плеј-оф за влез во елиминациите.
Есенва, Шкендија ќе биде вториот македонски клуб по Вардар (2017) кој ќе игра групна фаза во едно европско натпреварување. Натпреварите започнуваат крајот на септември, а македонскиот шампион со оптимизам ја чека можноста да испише нова страница во историјата на македонскиот клупски фудбал.
