Фудбалската федерација на Македонија (ФФМ) официјално го назначи Влатко Колев за нов селектор на македонската репрезентација до 17 години (генерација 2009). Колев доаѓа на местото на Драган Начевски, кој својата тренерска кариера ќе ја продолжи во кипарскиот фудбал.
Колев е носител на тренерска Про лиценца и зад себе има речиси две децении богато искуство во работата со младински категории. Во својата кариера работеше во некои од најреномираните македонски клубови како Вардар, Работнички и Металург, а двапати беше прогласуван за тренер на годината во младинскиот фудбал.
Поранешен фудбалер и дел од шампионските генерации на Вардар и Силекс, Колев настапуваше и за Македонија Ѓорче Петров. Со неговото назначување, ФФМ очекува свеж пристап и нова енергија во развојот на младите таленти, со цел подготвување на генерацијата 2009 за претстојните предизвици на меѓународната сцена.
