Фудбалската федерација на Македонија (ФФМ) ги информира навивачите дека започна продажбата на билети за квалификацискиот натпревар за Светското првенство 2026, кој ќе се одигра на 10 октомври во Гент, Белгија, меѓу репрезентациите на Белгија и Македонија.
Според правилата на УЕФА, за македонските навивачи се издвоени 900 билети во делот од стадионот резервиран за гостинските поддржувачи. Цената на билетите е утврдена од Фудбалската федерација на Белгија и изнесува 25 евра за возрасни, додека за деца до 12 години билетот чини 21 евро.
Продажбата се одвива исклучиво преку официјалната онлајн платформа на ФФМ – eticket.ffm.mk. По извршената уплата, секој навивач најпрво добива електронски ваучер како потврда за трансакцијата, а врз основа на него се издава официјалниот билет кој се испраќа на наведената е-маил адреса. Доставата се врши електронски и билетите пристигнуваат во рок од најдоцна две седмици.
ФФМ ги повикува сите љубители на фудбалот да си обезбедат билет навреме и да бидат силна поддршка за македонската репрезентација на овој клучен квалификациски натпревар.
