Третолигашот Љуботен во првата фаза од Купот ќе се соочи со прволигашот Македонија ЃП. Разликата во квалитетот е голема и повеќе од јасно е дека „лавовите“ од Ѓорче се изразити фаворити, па се очекува без проблем да триумфираат и да се пласираат во следната рунда.
Сепак, мечот нема да се одигра во Тетово, туку на стадионот во Ѓорче, што значи дека Љуботен ќе биде формален домаќин, а Македонија ЃП формален гостин, иако „лавовите“ практично ќе играат на свој терен.
Како што веќе објави Спортска Мрежа, главен судија на натпреварот ќе биде Никола Петковски од Куманово. Негови помошници ќе бидат Александар Ѓурковски и Станко Митровиќ, исто така од Куманово, додека четврти судија ќе биде Дарко Стојчевски од Скопје. Натпреварот е закажан за утре (вторник) со почеток во 16 часот.
