Емануел Аворнио, доскорешниот напаѓач на Шкупи, официјално е нов фудбалер на Башкими. Интернационалецот од Гана реши да остане во Првата македонска лига и да го засили новиот член на елитата, кој одлично ја започна сезоната со две победи и едно реми.
Аворнио минатата сезона постигна пет голови во дресот на Шкупи и се очекува неговото искуство и голгетерски инстинкт значително да придонесат за уште подобри резултати на екипата од Куманово.
Новиот напаѓач попладнево беше присутен на стадионот во Куманово, каде што Башкими славеше со 3:1 против Тиквеш. Тој имаше можност одблиску да ја почувствува фантастичната атмосфера што ја создаваат навивачите кога клубот игра на домашен терен.
Со доаѓањето на 24-годишниот гански напаѓач, тренерот Муарем Муарем добива уште едно силно оружје во офанзивата, а амбициите на Башкими за успешна сезона стануваат уште пореални.
