Дејвис куп репрезентативецот на Македонија, Кристијан Јанев, на импресивен начин без загубен сет го освои турнирот „Интеко Опен 2025“ што денеска заврши во Скопје.
Јанев во сите пет меча на турнирот славеше со по 2-0 во сетови, а во големото финале го декласира Војин Саџаковиќ од Србија, препуштајќи му само еден гем (6:0, 6:1).
Претходно во второто коло го совлада Димитриос Мелисоглу од Грција (6:3, 7:5), во третото беше подобар од Салдин Рама од Косово (6:4, 6:4), во четвртфиналето го елиминираше третиот носител, Британецот Арчи Греј (6:2, 6:1), а во полуфиналето славеше против вториот носител, Романецот Лукас Милош (6:4, 6:1).
Македонскиот тенисер имаше забележителен настап и во конкуренција на двојки, каде заедно со Ерион Незири стигнаа до полуфиналето, но беа поразени од турскиот тандем Емре Алтамиш и Берке Мухамер (2-0), кои подоцна го освоија турнирот во двојки.
Солиден настап имаше и Незири кој освен полуфиналето во двојки, во сингл категоријата одигра одличен меч против Саџаковиќ, но по голема борба загуби со 2-1 во сетови, откако решавачкиот сет го изгуби во тај-брејк.
Кај девојчињата, Мила Јовановски стигна до финале во конкуренција на двојки заедно со Украинката Софија Дрозденко, но беа поразени во два сета (7:6, 7:5) од романско-украинската комбинација Сара Косма и Никол Нерија.
Со „Интеко Опен“ заврши третата тениска недела во Скопје, а веќе од денес стартува и четвртиот турнир – „J30 Скопје, Pointer Tennispark Open 2025“, за тенисери и тенисерки до 18 години.
