Струмичката фудбалска гордост Беласица првиот домашен натпревар во новата сезона од Втората лига против Скопје ќе го одигра под рефлектори.
Како што најавија од струмичкиот клуб натпреварот ќе се одигра во вечерен термин од 19:30 часот в недела (31 август).
Ова ќе биде првиот натпревар под рефлектори во новата сезона во Втората лига, а повеќе од јасно е дека таков натпревар ќе биде вистински фудбалски празник за градот, но воопшто и за второлигашкиот фудбал.
Клубот потврди дека сите домашни натпревари, додека налагаат временските услови, ќе се играат во вечерни термини, што ќе донесе посебна доза возбуда за љубителите на фудбалот. Беласица, која важи за еден од најсериозните конкуренти за пласман во Првата лига, повикува на масовна поддршка од сите навивачи, симпатизери и граѓани на Струмица и околината.
„Ги каниме сите љубители на фудбалот од Струмица и околината во недела да дојдат и да го подржат нашиот тим и да уживаат во вечерната атмосфера која многу малку клубови од Македонија можат да си ја препуштат и е реткост во нашиот фудбал“, стои во соопштението на клубот.
Влезниците за натпреварот ќе бидат по симболична цена од 100 денари.
Беласица ја започна сезоната со високи амбиции и со јасна цел – враќање во македонската фудбалска елита, а дуелот со ФК Скопје ќе биде првиот сериозен тест на домашен терен.
Минатата сезона исто така Беласица на домашен терен одигра натпревар под рефлектори против Охрид, во рамки на 3. коло.
