Охрид по првпат го освои меморијалниот турнир “Крсте Андоновски 2025”, откако во големото финале славеше над македонскиот шампион Еурофарм Пелистер.
Голманот на Охрид, Даниел Ѓорѓески зборуваше за Спортска Мрежа за финалниот меч со пелистерци.
Како што вели Ѓорѓески победата над шампионот е заслужена, вели дека имале голема мотивација за да го освојат охридскиот турнир.
,,Одигравме еден тежок и возбудлив натпревар против шампионот на Македонија. Ние имавме голема мотивација и желба да го освоиме и овој турнир, овојпат пред домашната публика и мислам дека токму тоа и беше пресудно на овој натпревар – желбата и борбеноста и сакам да им честитам на дечките за таквата игра и, според мене, заслужената победа”, рече Ѓорѓески за Спортска Мрежа.
Охридскиот и струшкиот турнир се можност плус за да се темпира формата за новата сезона, а Ѓорѓески вели дека се воигруваат бидејќи се нова екипа.
,,Ова е уште подготвителен период, ние сме нова екипа, сè уште се воигруваме, но сепак успеавме да направиме добри резултати, два турнири – два освоени трофеи за релативно краток период што сме заедно, и тоа е одлично за нас како екипа..за да ја кренеме самодовербата и хемијата, што е многу важно пред стартот на сезоната да влеземе уште помотивирани и полни со самодоверба, бидејќи нè чека тешка сезона со доста квалитетни натпревари ”, дополнува Ѓорѓески за Спортска Мрежа.
