Нашите македонски одбојкари од вчера се повторно во Скопје, каде што во недела од 20:00 часот ќе ја пречекаат селекцијата на Грузија во последниот натпревар од квалификациите за Европското првенство 2026. Овој дуел е решавачки за тоа дали Македонија ќе обезбеди пласман на четвртото континентално натпреварување по ред.
По поразот во Грција, каде што нашите одбојкари не успеаја да освојат ниту сет и да си ја олеснат задачата, сега единствена опција останува максимална победа над Грузија. Сигурен триумф од 3:0 со што поголема поен-разлика би значел пласман на ЕвроВолеј 2026.
Селекторот Јошко Миленкоски останува оптимист:
„Натпреварот со Грција го оставаме зад нас. Станува збор за силна репрезентација, составена од квалитетни играчи, кои тоа го покажаа на теренот. И покрај тоа, ние имавме добри моменти, особено во третиот сет кога стигнавме до две сет-топки, но не успеавме да ги искористиме. Сега сме целосно фокусирани на натпреварот со Грузија, кој мора да го добиеме со максимален резултат. Очекуваме полна сала и силна поддршка од нашите навивачи, заедно со кои верувам дека ќе стигнеме до посакуваниот резултат и ново учество на Европското првенство“, изјави Миленкоски.
Македонија е во борба за едно од петте места за најдобро второпласирани селекции, кои заедно со седумте првопласирани од групите ќе обезбедат билет за ЕвроВолеј 2026. Нашиот национален тим во моментов е во директна трка со Австрија и Норвешка, но со подобар поен-количник од двете репрезентации.
Затоа е клучно во неделниот дуел со Грузија македонските одбојкари да забележат победа со 3:0. Да се биде или не, сега е најважниот дуел на нашите одбојкари затоа им е потребна во што поголем број нашата верна публика да ги бодри во недела во 20:00 часот, во СЦ „Борис Трајковски“ во Скопје.
Влезот за сите љубители на одбојката е бесплатен. Поддршката од трибините е повеќе од потребна! Да навиваме и да им посакаме успех на нашата одбојкарска репрезентација.
