Второлигашот Победа од Прилеп ја започна акцијата за продажба на сезонски билети. Со оваа иницијатива клубот се надева дека прилепчани ќе ја покажат својата љубов и страст во период кога „црвено-белите“ се наоѓаат во тешка финансиска состојба.
Сезонскиот билет чини 1.200 денари и нуди пристап до сите домашни натпревари во тековната сезона, брза и едноставна проверка на влез, како и можност за директна поддршка на клубот во овие тешки моменти.
Состојбата во ФК Победа е крајно алармантна. Иако Советот на Општина Прилеп на последната седница одобри финансиска помош од еден милион денари, сè уште постои неизвесност кога средствата ќе бидат префрлени, имајќи предвид дека веќе се распишани избори.
Доколку парите не стигнат навреме, Победа би можела автоматски да биде суспендирана и испадната во четврта лига, затоа што нема да може да присуствува на три последователни натпревари.
