Екипата на Бутел Скопје е вториот финалист на 53. издание од Струшкиот турнир, откако во последниот натпревар од групната фаза извојува тесна победа над Тиквеш со резултат 31-30.
Со овој триумф, Бутелци го зазедоа првото место во групата со четири освоени поени. Иако беа во негатива од шест гола, покажаа борбен дух и истрајност, се вратија во игра на десетина минути до крајот, а во завршницата беа поснаодливи и ја запишаа победата.
Инаку, Тиквеш одлично го отвори натпреварот и поведе со 6-3, при што Печурица блескаше на голот. Бутел брзо се врати во ритам, неколкупати намалувајќи на минимална разлика, но кон крајот на првото полувреме падна во форма, што им овозможи на Кавадарчани да заминат на пауза со предност од 20-15.
Клучните моменти се одиграа во вториот дел од мечот, кога избраниците на Кристијан Грчевски направија серија и поведоа со убедливи 22-16. Но, тогаш блесна голманот Стојаноски со неколку врвни интервенции, со што ја разбуди екипата на Бутел.
Во победничкиот табор се истакнаа Николов со девет погодоци, Спасовски постигна шест, а Субашевски пет гола. Стојаноски забележа девет успешни интервенции, додека Трајкоски имаше неколку значајни одбрани во клучните моменти.
Од тимот на Тиквеш, најрасположен беше Димитар Коцев со дури 11 гола, а Печурица одбрани девет удари кон својот гол.
Финалната пресметка меѓу Охрид и Бутел Скопје е закажана за утре со почеток од 20:45 часот. Натпреварот за третото место меѓу Тиквеш и Бурса ќе се игра од 18:45 часот, додека утринскиот дуел меѓу Струга и Раднички Крагуевац започнува во 10:00 часот.
