Фудбалскиот клуб Вардарски од Богданци, кој минатата сезона по 27 години пауза настапуваше во Втората македонска фудбалска лига, повеќе нема да се натпреварува во сениорска конкуренција.
Како што дознава Спортска Мрежа, ФК Вардарски веќе доставил известување до ОФС Кочани, каде што е седиштето на Трета лига – Исток, дека нема да настапи во сезона 2025/26.
По експресното испаѓање од Втората лига и враќањето во Третата лига – Исток, раководството на клубот донесе одлука тимот да не продолжи со настапи во сезоната 2025/26.
Минатата сезона, Вардарски им понуди на љубителите на спортот во Богданци ретка можност да гледаат второлигашки фудбал, но резултатите не беа охрабрувачки – клубот заврши на последното место на табелата и со тоа повторно се најде меѓу третолигашите.
Одлуката за повлекување значи дека оваа сезона градот на југот од Македонија ќе остане без сениорски фудбал, а останува да се види дали клубот ќе се врати во иднина и повторно ќе заживее фудбалската сцена во Богданци, кога е во прашање сениорскиот фудбал.
Како за спомен остануваат натпреварите од Втората лига од сезона 2024/2025, а особено натпреварот од 2. коло од минатата сеозна кога во Богданци гостување Кожуф од Гевгелија и беше одиграно дербито на Југот, а стадионот беше исполнет во целост со домашната публика и гостинската публика и навивачи.
Ова значи дека сега Трета лига – Исток наместо со 12 останува со 11 екипи, а во истата ќе настапат Хоризонт Турново, Брегалница Делчево, Тиверија, Дојранско Езеро, Ударник, Победа Валандово, Овче Поле, Малеш, Карбинци и Рудар, Светлост Зрновци.
Новата сезона ќе започна на 7 септември, а како што дознава Спортска Мрежа следната недела ќе се одржи ждрепката за новата сезона.
