Во сезоната 2025/26, Третата македонска фудбалска лига воведува нови правила со цел поголема минутажа за младите играчи. Секој клуб учесник мора да има во составот најмалку четири фудбалери кои немаат наполнето 21 година.
Тоа што го најави Спортска Мрежа кон средината од месец јули, сега се потврдува.
Според пропозициите, натпреварот мора да започне и првото полувреме да заврши со најмалку тројца играчи под 21 година. Исклучок од ова правило е можен само во случаи на епидемија, пандемија или доколку екипата остане со само единаесет фудбалери кои не можат да настапат.
За сезоната 2025/26, како фудбалери под 21 година се сметаат сите родени на или по 1 јануари 2004 година. Овие играчи ќе имаат право на настап во оваа категорија во текот на целата сезона.
Во Третата лига не е дозволено учество на странски фудбалери. Исто така, секој играч во рок од 48 часа може да одигра најмногу три полувремиња, од кои најмногу две во период од 24 часа.
Третата лига моментално е поделена на пет региони: Исток, Запад, Југозапад, Север и Југ.
