Со цел промоција и унапредување на женскиот фудбал во Куманово, под покровителство на Општина Куманово и ОФС Куманово, денес започнува традиционалниот турнир во женски фудбал „ЖФК Речица 2012 – 2025“.
Турнирот ќе се одржи на стадионот во село Речица, кој располага со современ спортски комплекс – голема и покриена трибина, рефлектори за вечерни натпревари, гардероби, теретана и сместувачки капацитети за играчите.
Годинава учество земаат четири силни екипи: домаќинот ЖФК Речица, поранешниот шампион ЖФК Каменица САСА, актуелниот шампион ЖФК Љуботен од Тетово и најтрофејниот клуб во Србија – ЖФК Машинац од Ниш.
Вечерва се играат двете полуфиналиња под рефлектори:
18:00 ч. ЖФК Машинац (Ниш) – ЖФК Љуботен (Тетово)
20:00 ч. ЖФК Речица – ЖФК Каменица САСА
Утре (10 август) на програмата се:
17:30 ч. Натпревар за трето место
19:30 ч. Финале
Сите натпревари, освен финалето, ќе се играат по 2×40 минути, додека финалниот меч ќе трае стандардно – 2×45 минути. Во случај на нерешен резултат, веднаш ќе се изведуваат пенали.
Организаторите предвидоа и богати награди: пехари за прво до четврто место, како и индивидуални признанија за најдобар играч, стрелец, голман, млад играч и најдобар судија.
Очекувајте два дена врвен женски фудбал, силна конкуренција и спектакуларна атмосфера во Речица.
