Македонскиот кошаркарски вицепрвак во женска конкуренција, Крива Паланка, во новата сезона ќе се соочи со интернационален предизвик. Тимот ќе биде дел од ВАБА 2 лигата – втората Јадранска лига за жени.
„Ова ќе биде наше прво интернационално искуство, и во ВАБА 2 лигата конкуренцијата ќе биде сериозна, со тимови од Хрватска, Словенија, Црна Гора и Австрија. Сепак, ние како клуб сме целосно подготвени да го дадеме максимумот. Првите два натпревари ги играме на домашен терен и верувам дека ќе ја претставиме Крива Паланка и Македонија на најдобар можен начин“, изјави тренерот Виктор Петковски.
Во ова натпреварување ќе учествуваат девет екипи кои ќе се борат за бодови на иста табела. Покрај Крива Паланка, во лигата ќе настапат тимовите на УБИ Грац од Австрија, Илирија, Јежица и Марибор од Словенија, Брод на Сави од Хрватска, Бановичи од Босна и Херцеговина, како и Подгорица од Црна Гора и Рајфајзен Дачес од Австрија.
Стартот на натпреварувачката сезона е закажан за 27 септември, а сите екипи ќе се натпреваруваат по систем со една табела.
Ова е значаен чекор во развојот на Крива Паланка, која преку ова натпреварување ќе има можност да се натпреварува на повисоко регионално ниво и да стекне вредно искуство.
