Кошаркарите на Чаир 2030 остварија значајна победа над Работнички со 75:73 во натпревар одигран во салата „Шабан Трстена“, со што дополнително се оддалечија од долниот дел на табелата, а воедно ја продолжија кризата на „црвено-белите“.
Гостите од „Градски парк“ долго време имаа контрола на резултатот и на нешто помалку од пет минути до крајот водеа со 69:62 по поените на Ефремовски. Сепак, во финишот домаќините покажаа поголема концентрација и со серија од седум поени на Тачи успеаја да се вратат во игра и да направат пресврт.
Работнички во завршницата постигна само неколку поени преку Робев и Рикиќ од линијата за слободни фрлања, додека Ефремовски со погодок намали на 74:73 на нешто повеќе од една минута до крајот.
Во последната минута двете екипи направија неколку грешки, но клучниот момент се случи на 20 секунди пред крајот кога Реџа реализираше едно од двете слободни фрлања за водство на Чаир 2030 од 75:73. Работнички имаше шанса за израмнување или победа, но обидите на Грушановиќ и Рикиќ не завршија во кошот, па домаќините се израдуваа на важниот триумф.
Најефикасен во редовите на Чаир 2030 беше Кришнан со 17 поени, додека Тачи постигна 16 поени и додаде девет асистенции и пет скока. Реџа придонесе со 14 поени и девет скока, а Билингсли запиша „дабл-дабл“ со 10 поени и 12 скока.
Кај Работнички се истакна Ефремовски со 22 поени, девет скока и три асистенции, Рикиќ имаше 14 поени и дури 21 скок, додека Грушановиќ натпреварот го заврши со 13 поени.
Со оваа победа Чаир 2030 стигна до осмиот сезонски триумф и се искачи кон средината на табелата, додека Работнички останува во долниот дел со учинок од шест победи и 11 порази.
