Македонската одбојкарска репрезентација загуби со 0:3 (19:25, 23:25, 21:25) во вториот пријателски натпревар против селекцијата на Бугарија, кој се одигра во салата „Левски“ во Софија. Средбата беше одиграна зад затворени врати.
По договор меѓу селекторите, беше одигран и дополнителен четврти сет, кој македонските одбојкари го загубија со 25:27.
По солидниот настап на првиот натпревар, оваа средба имаше низа на слабости во играта и тактиката на тимот, на кои ќе треба да се посвети внимание пред квалификациските дуели против Грција и Грузија. Селекторот Јошко Миленкоски им даде шанса на сите играчи кои ги имаше на располагање.
Капитенот Никола Ѓоргиев беше најефикасен со 14 поени, додека Стојан Илиев и Лука Костиќ запишаа по 10, а Александар Љафтов и Филип Савовски по 6 поени.
Репрезентацијата се враќа во Скопје, каде ќе ги продолжи подготовките за претстојните евро-квалификации.
