Македонскиот тенисер Калин Ивановски со импресивна игра и само три загубени гема избори сигурен пласман во второто коло на ИТФ турнирот М15 во српската Куршумлијска Бања.
Осмиот носител на турнирот го совлада Колумбиецот Фрејзлер Ренгифо со 2-0 во сетови (6:2, 6:1), при што му беа потребни само 70 минути за триумф. Ивановски доминираше од самиот почеток, отворајќи го мечот со водство од 4:0 во првиот сет, кој го заврши со 6:2. Во вториот сет продолжи во ист стил, поведувајќи со 3:0, а единствениот гем кој го загуби беше при водство од 3:1. Сетот го заврши убедливо со 6:1.
Во следната фаза, Ивановски ќе се соочи со домашниот тенисер Ѓорѓе Шапиќ, кој беше подобар од Швајцарецот Сирил Пилонел, славејќи со 2-0 во сетови.
На истиот турнир, македонскиот претставник Горазд Србљак беше елиминиран во првото коло, иако претходно избори три победи во квалификациите.
