Второлигашот Детонит Плачковица од Радовиш претстави уште две нови засилувања за новата сезона која започнува на 23 август (сабота).
Во тимот предводен од штипскиот стратег Горан Здравков пристигнаа повратникот Стефан Бабунски кој доаѓа од Брегалница и младиот Тино Спасиќ кој доаѓа од Скопје.
Бабунски е повратник во Радовиш, доаѓа во добро позната средина за него каде имаше претходно успешен престој и со успех го носеше дресот на Детонит Плачковица, кога таа генерација на фудбалери испишаа историја со баражот за Прва лига против Вардар.
Левото крило само шест месеци остана во Штип и се врати во Радовиш, каде за Детонит Плачковица настапуваше од август 2022 до јануари 2025, а претходно Бабунски беше дел и од радовишка Плачковица кога настапуваше во период од август 2020 до јули 2021 година, а низ својата кариера има настапувано и за Каменица Саса, Брера Струмица и Еуромилк ГЛ.
20-годишниот Спасиќ е дефанзивен играч од средниот ред кој доаѓа од второлигашот Скопје, а кариерата ја започна во скопски Вардар.
Претходно, како што веќе објави Спортска Мрежа екипата на Детонит Плачковица се засили со искусниот Сашко Дуков и Филип Ѓорѓиевски, двајцата во пакет дојдоа од Кожуф.
