Македонскиот суперлигаш РК Алкалоид ги започна подготовките за натпреварувачката сезона 2025/26. Првиот собир се одржа во салата „Автокоманда“, а на почетокот на подготовките присуствуваше и генералниот директор и претседател на Управниот одбор на „Алкалоид АД Скопје“, Живко Мукаетов, кој им посака успешна сезона исполнета со здравје, тимска сплотеност и натпреварувачки успеси.
Првата фаза од подготовките ќе се реализира во Скопје, потоа тимот ќе замине во Маврово, а подготовките ќе продолжат со мини турнеја во Србија и Хрватска. Таму се планирани осум контролни натпревари против ривали од Србија, Хрватска и Словенија, како дел од подготовката за новата сезона.
Алкалоид го претстави и своето ново засилување – исландскиот ракометар Улфар Пал Монси Тордарсон. Дваесет и петгодишниот бек доаѓа од екипата на Валур, со која минатата сезона беше меѓу најдобрите стрелци во Европската лига на ЕХФ.
За Тордарсон, настапите во дресот на Алкалоид ќе бидат прво интернационално искуство, откако претходно настапуваше за Афтурелдинг и Стјарнан во родниот Исланд.
Покрај новитетите, клубот информираше и за заминувањата – Арно Бинго и Михајло Младеновиќ повеќе нема да бидат дел од тимот, додека Костадин Петров ќе се приклучи на РК Мулти Есенс, каде ќе работи на рехабилитација и враќање на формата по повредата. Алкалоид им се заблагодари за досегашниот придонес и им посака среќа во понатамошната кариера.
Алкалоид амбициозно влегува во новата сезона, со цел да продолжи со растот и настапите на високо ниво во македонскиот и европскиот ракомет.
