Новиот суперлигаш Еурофарм Пелистер 2 продолжува со реализација на својата стратегија за градба на тим составен од перспективни млади македонски ракометари.
На списокот со нови имиња денес се приклучи еден од најголемите млади таленти на својата позиција – Илија Илијевски, кој потпиша долгорочен договор со клубот до јуни 2029 година.
Иако има само 15 години, Илијевски веќе се издвојува со своите физички предиспозиции, бидејќи е висок 202 сантиметри, а според стручниот штаб станува збор за ракометар со огромен потенцијал за развој. Тој во Битола пристигнува од Вардар Неготино – клубот во кој го направи првиот ракометен чекор.
Младиот десен бек ќе му биде ставен на располагање на тренерот Александар Зарков уште на почетокот на подготовките за новата сезона 2025/26.
Со овој потпис, Еурофарм Пелистер 2 јасно ја покажува визијата за иднината – создавање на силен тим заснован на млади домашни сили кои во следните години би можеле да бидат носители и во првиот тим.
