Селекторот на македонската сениорска машка одбојкарска репрезентација, Јошко Миленкоски, направи мала корекција во календарот за подготовките во пресрет на квалификациите за Европското првенство 2026. Првиот собир на националниот тим ќе биде одржан на 17 јули (четврток) во Маврово, три дена порано од првично најавениот датум (20 јули).
По напорната кампања во Златната Европска лига, одбојкарите добија краток одмор, а потоа повторно ќе се обединат со јасна цел – пласман на четвртиот континентален собир по ред.
Првата фаза од подготовките ќе се одвива десет дена во Маврово, по што селекцијата ќе замине за Бугарија, каде во Софија ќе одигра два контролни натпревари против домашната репрезентација, на 29 и 30 јули.
Финалната фаза од подготовките ќе се реализира во Скопје, каде одбојкарите ќе ја темпираат формата пред почетокот на квалификациските натпревари. Како генерална проба, од 5 до 7 август, ќе учествуваат на 49-то издание на Меморијалниот турнир „Бранко Хаџи Иљоски – Чајка“, кој ќе се одржи во салата „Борис Трајковски“. Покрај Македонија, учество ќе земат и селекциите на Бугарија и Швајцарија.
Квалификациите за ЕвроВолеј 2026 започнуваат на 13 август со гостување кај Грција во Атина, додека на 17 август, Македонија ќе биде домаќин на Грузија во Скопје, во последното коло од квалификацискиот циклус.
Амбициите се јасни – пласман на уште едно Европско првенство, што ќе биде четврто по ред во историјата на машката одбојкарска репрезентација.
