Со официјалното отворање на летниот преоден рок во македонската одбојка на 1 јули, клубовите веќе започнаа со активности на трансфер пазарот во пресрет на сезоната 2025/2026, а меѓу најбрзите беше освојувачот на Купот на ОФМ 2025 – Штип УГД.
Штипјани уште на првиот ден го промовираа првото засилување – Стојан Илиев, македонски репрезентативец и искусен интернационалец. 26-годишниот примач, роден во Струмица, пристигнува во Штип од хрватската Марсонија, по неколку успешни сезони надвор од земјава.
Илиев зад себе има богата клупска кариера со настапи во клубови од Хрватска, Грција, Романија, Израел, Кипар и Македонија, а беше дел и од репрезентацијата која ја избори нова сезона во Европската златна лига.
Ова е првото големо засилување за тимот на Штип УГД кој со новата сезона ќе дебитира на европската сцена преку настапот во ЦЕВ Челинџ купот, а од клубот најавуваат уште неколку имиња кои ќе го зајакнат ростерот до затворањето на преодниот рок, кој трае до 7 септември.
