Македонската женска клупска одбојка добива уште еден претставник на меѓународната сцена – екипата на Фит Фан Волеј ќе го направи своето прво интернационално појавување со учество во БВА Купот 2025, натпреварување во организација на Балканската одбојкарска асоцијација (БВА).
Минатата сезона беше историска за скопскиот клуб – „Фит Фан Волеј“ се пласираше во плејофот од домашното првенство, заврши на четвртото место и настапи на Ф4 турнирот во Купот на ОФМ 2025, поставувајќи темели за понатамошен напредок.
Со поглед кон иднината и со желба за нови предизвици, клубот реши да излезе на регионалната сцена, а БВА Купот ќе биде првата станица во оваа интернационална авантура. Досега, како македонски претставник во женската конкуренција се пријави само Фит Фан Волеј, а потврда за учество даде и ЖОК Борац од Босна и Херцеговина, кој ќе биде и домаќин на женскиот турнир.
Според правилата на БВА, потребен е минимум од четири екипи за реализација на натпреварувањето, кое треба да се одигра најдоцна до 12 октомври 2025 година. Победникот на турнирот ќе добие директна виза за учество во ЦЕВ Челинџ Купот, што му дава дополнителна тежина и атрактивност на натпреварувањето.
Ова ќе биде значаен исчекор не само за клубот, туку и за македонската женска одбојка, која сѐ повеќе добива интернационално внимание и настапи на пошироката европска сцена.
