Новиот борд на директори на ФК Пелистер одржа седница на управниот одбор, со која раководеше извршниот директор Александар Стефановски, а на која беа донесени значајни одлуки поврзани со иднината на клубот и подготовките за натпреварувачката сезона 2025/26.
Во рамки на седницата е дефинирана распределбата на буџетот кој е проектиран на околу еден милион евра. Средствата ќе бидат наменети за целите на сениорската екипа, развојот на пионерско-младинската школа и покривање на преостанатиот дел од долговите. Финансиската конструкција ќе биде обезбедена од единствениот акционер – Општина Битола, спонзорски и маркетинг договори, ваучер-системот на Министерството за спорт, како и поддршка од Фудбалската федерација на Македонија (ФФМ) преку програмата за младински фудбал.
Покрај тоа, клубот поставува јасна цел – целосна стабилизација на сениорскиот тим во Првата лига, како и квалитетна организација и стратегија во сите сегменти. Во завршна фаза е дефинирањето на стручниот и играчкиот кадар, како и подготовките за стартот на сезоната.
ФК Пелистер најави и активности околу реновирањето на стадионот „Петар Милошевски“ во координација со Општина Битола и ФФМ, како и посебни настани по повод 80-годишниот јубилеј од постоењето на клубот, кој ќе биде одбележан во текот на сезоната.
Клубот испраќа порака дека започнува нова ера на професионализам, стабилност и амбиција, со јасна визија за враќање на Пелистер на местото кое историски му припаѓа во македонскиот фудбал.
