Второлигашот Осогово кој имаше среќа во ждрепката и успеа да остане во Втората лига и во следната сезона, ги претстави првите две летни засилувања за новата сезона.
Се работи за искусниот Христијан Митревски, кој доаѓа од редовите на новиот прволигаш Башкими. 28-годишниот фудбалер беше дел од Башкими во период од јануари 2024 до јуни 2025 година, претходно настапуваше за Каменица Саса, Охрид, Слога од Виница и за Кадино.
Се работи за искусен дефанзивец кој на Осогово ќе му донесе квалитет и освежување во редовите на тимот од Кочани, а дополнително и стабилност и сигурност во самата игра.
Осогово на голманската позиција се засили со Филип Лазаревски, кој доаѓа од редовите на Вардарски од Богданци, екипа која како последнопласирана испадна во Трета лига – Исток.
Лазаревски има 28 години, а во својата кариера го чуваше голот на Слога Виница, Кадино, Воска Спорт, Скопје, Работнички, Шкупи, Тетекс, Кораб, Илинден, Борец, Еуромилк ГЛ, Металург и Беласица.
Исто така, Осогово ја продолжи соработката со сите фудбалери кои го изнесоа најголемиот товар во претходната сезона.
Осогово минатата сезона заврши на 14-тото место, лошата есенска полусезона беше поправена со значително подобрена игра во пролетниот дел, по доаѓањето на Крсте Крстев на позицијата шеф на стручниот штаб, но во баражот Осогово загуби од Шкендија Арачиново со 2:1, а потоа преку ждрепката екипата на Осогово имаше среќа и остана во Втората лига.
