Со четири натпревари одиграни вечерва, започна третото коло од Меморијалниот турнир во мал фудбал во Лабуништа, посветен на Башким Салкоски, Шериф Сефиданоски и Беким Бајрамоски. Екипите со амбиции за нокаут-фаза одиграа на високо ниво, а гледачите уживаа во атрактивни мечеви исполнети со голови, пресврти и голема борба.
Вечерта започна со ефикасен натпревар меѓу Идеал Рент а Кар и Рики СРЛ, кој заврши со победа на Идеал од 6:4. Двете екипи влегоа отворено, но искуството и рутината на Идеал беа пресудни во клучните моменти.
Во вториот натпревар, Кафе Бар Лавадо уште еднаш потврди дека е меѓу најсилните состави на турнирот. Со резултат од 6:2 ја совлада екипата на ХТМ Про Вин и го потврди првото место во својата група со три победи од три натпревари.
Третиот меч беше најофанзивниот за вечерта. Нетто Маркети, кои веќе имаа две високи победи, го добија дербито против Деко Лукс и Ресторан Лабуништа со 8:2, со што завршија совршено во групната фаза со вкупно 31 постигнат гол за три кола – импресивна бројка.
Последниот дуел беше и најизрамнет. Во вистинско дерби, Мечо Транс со минимални 1:0 го совлада тимот на Самир Муртезоски и со тоа ја комплетираше групната фаза со три победи од три натпревари, без примен гол. Одбраната беше клучна, а стрпливиот пристап им донесе победа и врв на табелата.
- Турнирот влегува во завршна фаза – се профилираат осминафиналните двојки
По овие натпревари, некои екипи веќе си го обезбедија местото во елиминационата фаза, додека другите ќе мора да го чекаат исходот од утрешните и понеделничките дуели за конечна слика.
Вечерва салата беше исполнета до последното седиште, немаше место каде да ја собери публиката, поголем дел од истата мораше со стоење да ги следи атрактивните натпревари. Ова е потврда дека Меморијаниот турнир во Лабуништа е вистински празник и сите љубители на малиот фудбал со нетрпение ги очекуваат натпревари.
- Награден фонд:
Првопласирана екипа: 2.000 евра
Второпласирана екипа: 700 евра
Третопласирана екипа: 300 евра
Спортска Мрежа како медиумски покровител продолжува ексклузивно да известува од Лабуништа – со резултати, табели, извештаи и фотографија од секоја вечер. Следете нè и понатаму – македонскиот спорт на едно место!
