Во општина Конче започнаа подготовките за едно од најпознатите спортски случувања во источниот дел на Македонија – „Петровденскиот турнир“ во мал фудбал, кој годинава ќе го доживее своето 28-то издание.
Традиционалниот турнир, кој се игра под рефлектори и привлекува бројни екипи од целата држава, ќе започне на 26 јуни, додека финалето е закажано за 12 јули, на денот кога се одбележува празникот Петровден. Пријавувањето на екипите е веќе во тек и ќе трае до 25 јуни.
Целокупната организација годинава ѝ е доверена на ФК Серта – Конче, клуб кој повторно го активираше фудбалскиот живот во општината, со поддршка од локалната самоуправа. Турнирот ќе се игра по систем 5+1 со футсал топки, што дополнително гарантира динамика, техника и возбудливи натпревари.
- Наградниот фонд изнесува вкупно 310.000 денари:
Прво место: 180.000 денари
Второ место: 80.000 денари
Трето место: 40.000 денари
Четврто место: 10.000 денари
Покрај главните парични награди, ќе бидат доделени и признанија во форма на ваучери за најдобар играч, најдобар стрелец и најдобар голман на турнирот.
Во изминатите години, турнирот стекна реноме како еден од најквалитетните летни фудбалски собири во државата, благодарение на учеството на врвни играчи, меѓу кои и членови на футсал репрезентацијата на Македонија.
За сите заинтересирани, екипите може да се пријават и добијат повеќе информации кај следните лица за контакт:
Ване (Грне): 076 487 532
Марјан (Чуши): 075 496 023
Исмет: 070 705 282
Џулијан: 070 426 042
Оваа година, Спортска Мрежа за првпат ќе биде медиумски покровител на турнирот, со што ќе се обезбеди професионално медиумско покривање на целиот настан, извештаи, анализи и видео-содржини, а ќе имаме и специјална емисија посветена на самиот турнир.
Со ова, „Петровденскиот турнир“ не само што продолжува да ја негува спортската традиција започната во 1997 година, туку станува и важна алка во враќањето на спортскиот живот во руралните средини, како што е општина Конче.
