РК Радовиш и следната сезона ќе биде дел од ракометната Суперлига, откако успеа директно да обезбеди опстанок завршувајќи на четвртото место во плеј-офот – успех кој дојде по сезона полна со турбуленции, но и со инспиративно лидерство од младите тренери Спасе Ѓоргиев и Александар Долдуров.
Двајцата млади стратеги го презедоа кормилото на тимот во март 2024 година, кога Радовиш сè уште се натпреваруваше во Првата лига. Во борбата за директен пласман во Суперлигата, Радовиш ја загуби трката со Борец ФЛ (тогаш РК Бисинов), кој стана шампион. Но, велешкиот тим потоа беше исфрлен од Суперлигата, додека Радовиш преку бараж успеа да избори враќање во елитата.
Во баражот одигран во салата „Автокоманда“, Радовиш се соочи со Еурофарм Пелистер 2 – голем фаворит на хартија. Но, и покрај тоа што на полувремето губеше со 14:9, Радовиш израмни на 26:26 и во последната секунда преку слободен удар на Здравко Постолов стигна до победа и сензационално враќање во Суперлигата. Поддршката од навивачите „Лебари“ беше клучна – тие веруваа кога другите се сомневаа.
Верните „Лебари“ и ракометарите на Радовиш ја прославија големата победа во баражот и враќањето во Суперлигата.
Но, вистинскиот предизвик дојде потоа.
Подготовките за новата сезона започнаа дури две недели пред почетокот, со финансиски проблеми и неизвесен ростер. Сепак, Ѓоргиев и Долдуров успеаја да задржат позитивна атмосфера и мотивираност во тимот. Во текот на првата полусезона, Радовиш забележа значајни победи, како онаа над Струга и ремито против Борец ФЛ.
Потоа дојде до тренерска промена – Игор Котевски накратко го презеде тимот и без официјална најава, навивачите открија дека Котевски си заминал, откако објавија на нивната официјална фејсбук страница дека тој повеќе не е тренер. Ѓоргиев и Долдуров повторно се вратија на кормилото – токму во најважниот момент.
Под нивно водство, Радовиш ја исполни целта – директен опстанок во Суперлигата!
Со огромен ентузијазам, тактичка зрелост и водство од срце, Ѓоргиев и Долдуров ја испишаа историјата на Радовиш. Не само што го вратија клубот во елитата, туку го задржаа таму – и тоа во време кога малкумина веруваа дека е можно.
Следната сезона носи нови предизвици – конкуренцијата расте, буџетите се поголеми, а тимовите се амбициозни. Но ако нешто покажа Радовиш оваа година, тоа е дека со вистински луѓе, вистинска хемија и поддршка од навивачите – ништо не е невозможно.
