ГРК Охрид на последниот натпревар од сезоната 2024/25 во македонската Суперлига официјално се збогуваше со неколку ракометари.
На свеченоста пред мечот со Тиквеш, клубот изрази голема благодарност до тренерот Стевче Алушовски и до играчите Бобан Ристевски, Милорад Кукоски, Никола Јукиќ, Живан Пешиќ, Хироки Матсуока, Горан Крстевски и Циао Винициус, кои си заминуваат од тимот по завршувањето на оваа сезона.
Особено емотивен беше моментот посветен на поранешниот капитен и долгогодишен член на клубот, Крсте Андоновски, кој ја завршува својата играчка кариера. Андоновски ќе продолжи да биде дел од ГРК Охрид, но сега во тренерската структура на клубот.
Од клубот информираа дека направиле обид да го задржат и младиот ракометар Петар Николоски, кому му беше дадена шанса оваа сезона да настапува со првиот тим. Сепак, како што посочуваат од Охрид, понудата била одбиена од страна на играчот.
ГРК Охрид на сите играчи кои заминаа им посака многу успех и среќа во понатамошната кариера, и порача дека тие секогаш ќе бидат дел од охридското ракометно семејство.
