Екипата на Ѓорче Петров ја освои 18-тата титула во Купот на Македонија во женска конкуренција откако во финалето триумфираше над Чаир со резултат од 36:19.
„Лавиците“ во целост го надиграа Чаир и во своите витрини ја додаваат 18-тата титула, која е втора во низа, откако Ѓорче Петров и минатата година ја освои Куп титулата. За „лавиците“ ова е успешна сезона крунисана со двојна титула.
Чаир по одличното второполувреме во полуфиналето против Металург Автокоманда стигна до големото финале каде ќе бореше за првата Куп титула во клупската историја, но сепак „лавиците“ беа тие кои се закитија со златото и сезоната ја завршуваат со двојна круна.
Првиот гол во финалето го постигна екипата на Ѓорче Петров во третата минута од натпреварот, a брзо потоа беа постигнати неколку погодоци за во седма минута резултатот да биде 4:3 за „лавиците“. Брзо потоа Чаир дојде до 4:4, но Ѓорче Петров направија серија од два погодоци за ново водство 6:4.
До крајот на мечот „лавиците“ ја билдаа разликата која на полувреме изнесуваше 15:9, разлика која беше тешка Чаир да ја надополни во вториот дел, па тука беше решен и мечот.
Во вториот дел „лавиците“ ја одржуваа високата предност и воопшто не му дозволија на противникот да дојде можност да го загроши резултатот, со што тимот на Ѓорче Петров продолжи да ја полни мрежата на противникот се до конечни 36:19 и со тоа дојде до 18-тата титула во Купот на Македонија во женска конкуренција.
За МВП на Ф4 турнирот во Радовиш беше прогласена Ана Враниќ од Ѓорче Петров, за најдобра голманка Катарина Митровиќ од Чаир, а за најдобар стрелец Ивана Дезиќ од Ѓорче Петров.
Радовиш беше домаќин на Ф4 Купот на Македонија во женска конкуренција, а во СРЦ „25 Мај“ годинава се играше и Купот во одбојка во машка и женска конкуренција, футсал Купот на Македонија, а сега и женскиот Ф4 турнир во ракомет. Радовишани имаа можност годинава да проследат квалитетни натпревари од повеќе спортови, откако СРЦ „25 Мај“ беше реновирана.
