Најдобриот стрелец на второлигашот Каменица Саса, Андреј Симевски, кариерата ќе ја продолжи во нова средина, откако постигна 15 погодоци во сезоната 2024/2025 и имаше клучна улога во успешниот настап на клубот од Македонска Каменица.
28-годишниот фудбалер од Пехчево одигра блескава сезона во дресот на „рударите“, а по завршувањето на натпреварувачката година, реши да се раздели со клубот. Симевски се прости од своите соиграчи и навивачите со емотивно обраќање:
„Најпрво сакам да ги поздравам сите оние што не веруваа во нашата екипа, особено во мене. Прекрасни дечки, различни карактери, но пред сè – борци. Како што заврши сезоната, постигнавме феноменален успех во кој 99% од луѓето не веруваа. И покрај многуте препреки, ние како тим и колектив докажавме – и на Каменичани, и на цела македонска јавност – дека можеме. Дечки, другари, колеги – секој еден од вас, ви благодарам од срце. Јас тука ставам крај, а вам ви посакувам сè најдобро и уште многу успеси во иднина“, изјави Симевски.
Каменица Саса одигра извонредна сезона во Втората лига, а Симевски беше вистински снајперист за клубот, со важни голови кои често ја носеа победата.
Неговото заминување ќе остави празнина, но и мотив за останатите играчи да продолжат во победнички ритам.
