Екипата на Лопате е новиот шампион на Општинската фудбалска лига (ОФЛ) Куманово за сезоната 2024/2025, со што се стекна со право да игра бараж за влез во Трета лига – Север.
Во возбудливо финале, Лопате со 1:3 славеше над Победа од Тромеѓа, во натпревар кој понуди многу неизвесност, пресврти и уживање за публиката.
Победа поведе во 36. минута кога Милан Благојевиќ погоди за 1:0. Сепак, радоста траеше кратко, бидејќи Иљбер Алили израмни на 1:1 во 44. минута, резултат со кој се замина на полувреме.
Во второто полувреме, Лопате направи целосен пресврт. Ринор Исени постигна гол во 54. минута за водство од 1:2, а Љиродон Реџепи во 80. минута го постави конечниот резултат од 1:3.
Полуфиналето и финалето се одиграа на одличниот терен во Агино Село, каде ФК Македонија Агино беше технички организатор на натпреварите.
