Фудбалерите на Преспа од Ресен ја завршија сезоната на најдобар можен начин, освојувајќи ја титулата во Третата македонска фудбалска лига – Југозапад. Тимот ја оствари првата од двете клучни цели – стана шампион во својата група, а сега целото внимание е насочено кон баражот за пласман во Втората лига.
Во последното 22. коло, на домашен терен, Преспа ја совлада екипата на Света Троица од Охрид со 2:1. Гостите први го отворија резултатот преку Хадис Сулејмани во 20. минута, но Преспа одговори брзо – десет минути подоцна, Никола Угриноски израмни на 1:1. Во вториот дел, победата ја запечати Александар Поповски со погодок во 68. минута, по што следеше славје и свечено подигнување на шампионскиот пехар.
Тимот од Ресен низ целата сезона покажа стабилност и квалитет, забележувајќи 15 победи, четири ремија и само два порази во 21 натпревар. Преспа го имаше вториот најдобар напад во лигата со 49 постигнати голови, само 11 помалку од Сатеска која го имаше најефикасното напад, но токму ресенчани може да се пофалат со најдобрата дефанзива – само 16 примени погодоци.
Фудбалерите на Света Троица со шпалир го поздравија шампионот Преспа на Градскиот стадион во Ресен пред почетокот на мечот.
Последното коло донесе интересни резултати и кај останатите екипи. Евротиоп со погодок на Стефан Бончаноски уште во 11. минута славеше минимално над Славеј од Мешеишта. Караорман сезоната ја заокружи со победа од 1:0 над Кравари, благодарение на голот на Ивица Ќелешоски во 54. минута. Екипата на Кораб на домашен терен го совлада Велешта со 2:1 – стрелци беа Ујкан Јани и Адем Колоња, додека за гостите погоди Диели Каба.
Сатеска од Волино го заврши натпреварот против Влазними со победа од 2:1, благодарение на двојниот стрелец Лука Богданоски, додека почесниот гол за гостите го постигна Сокол Арифи. Тимот на Демир Хисар беше слободен во последното коло.
Титулата во ТМФЛ – Југозапад е само прв чекор за Преспа. Тимот сега се подготвува за следниот голем предизвик – баражот за Втора лига, кој може да ја заокружи оваа историска сезона со уште еден успех.
