Искуството останува во Битола! Еурофарм Пелистер објави дека постигнал договор за продолжување на соработката со еден од своите најискусни ракометари – Илија Абутовиќ. Српскиот интернационалец и во сезоната 2025/26 ќе го носи дресот на битолскиот тим, каде што ќе има улога на лидер и потпора на младиот состав на шампионот.
„Продолжува нашата тенденција шампионите да продолжат да го носат нашиот дрес и во иднина. Ни претставува особено задоволство што постигнавме договор за продолжување на соработката со Илија Абутовиќ. Српскиот интернационалец и во сезоната 2025/26 ќе настапува за Еурофарм Пелистер и со своето искуство и квалитет ќе биде еден од лидерите на нашиот млад тим. Неговата сезона, неговите настапи и победничкиот ген уште еднаш ни потврдуваат дека направивме вистински потег што го доведовме минатото лето“, истакнаа од битолскиот клубот.
Абутовиќ дојде во Битола минатото лето и веднаш се наметна како столб во одбраната на Еурофарм Пелистер. Неговите настапи, искуство и победнички менталитет беа клучни во шампионската сезона, а клубот ја препозна вредноста на неговиот придонес.
Абутовиќ е добро познато име на балканската и европската ракометна сцена. Својата кариера ја започна во Спартак Суботица во 2006 година, по што следеа настапи за белградски Партизан и словенечки Слован од Љубљана.
Во 2011 година потпиша за македонски Вардар, каде остана седум сезони и стана дел од златната генерација на скопскиот тим. Со „црвено-црните“ ја освои ЕХФ Лигата на шампионите и пет домашни титули, а подоцна ја прифати авантурата во Бундеслигата со Рајн Некар Левен. Во германскиот клуб мина четири сезони, пред да се пресели во Франција, каде играше за Шартр.
Во својата богата кариера, Абутовиќ освои и трофеи во српското првенство и Купот, како и четири изданија на СЕХА лигата.
Со продолжувањето на договорот, Еурофарм Пелистер го задржува не само еден од своите најдобри дефанзивци, туку и важен лидер во тимот кој ќе биде клучен во настапите на домашната и европската сцена и во следната сезона.
