По кратка пауза, ракометниот Куп на Македонија повторно ќе се решава во Охрид. Ракометната федерација на Македонија го потврди градот Охрид како домаќин на завршниот Ф4 турнир, кој ќе се одигра на 31 мај и 1 јуни во спортската сала „Билјанини Извори“.
Првичниот план беше завршницата да се одржи претстојниот викенд, но поради настапот на Алкалоид во финалето на Европскиот куп на ЕХФ, турнирот е одложен за крајот на месецот.
На турнирот ќе учествуваат четирите најдобри екипи: Алкалоид – актуелниот освојувач на Купот, Еурофарм Пелистер, Вардар и домаќинот Охрид, кој ќе се обиде да приреди изненадување на домашен терен.
Ждрепката за полуфиналните парови ќе се одржи на 21 мај, кога ќе стане јасно кој со кого ќе се соочи во борбата за финале. Охрид повторно добива можност да биде центар на македонскиот ракомет, со надеж за уште еден спектакуларен завршен турнир.
