Следниот викенд ќе започне новата сезона во ракометната Суперлига во машка конкуренција со натпреварите од првото коло.
Екипите влегуваат во финишот на подготовките и веќе анализите и стратегиите се прават за натпреварот од првото коло, а со тоа сезоната да започне според посакуваното. Првото коло ни го носи и дербито меѓу освојувачот на Купот екипата на Алкалоид и вицешампионот Вардар, кое се игра во Автокоманда.
Во рамки на првото коло Бутел на домашен терен ќе игра против Куманово, во меч каде домашниот тим ќе ја има улогата на фаворит, а неизвесен меч се очекува меѓу Прилеп и Пролет во градот под Марковите кули. Прилепчани ќе сакаат место во плеј-офот, а во таа борба влегува и Пролет.
Радовиш по една сезона се врати во Суперлигата, откако лани заврши на второто место во Првата лига и преку бараж обезбеди експресно враќање во друштвото на најдобрите во македонскиот ракомет. Радовишани сезоната ја отвараат на домашен терен против апсолутниот фаворит Охрид, „гладијаторите“ доаѓаат по цел „плен“.
Струга на домашен терен ќе го пречека новајлијата Бисинов од Велес, екипа која за првпат во својата историја ќе игра во Суперлигата на Македонија. Меч кој е важен и за двете екипи. Стружани сезона сакаат да ја започнат со триумф против екипата на Бисинов која во новата сезона влегува со цел за да биде стабилен суперлигаш, а потоа да се надградува за високи цели.
Одбраната на шампионската титула Еурофарм Пелистер ја започнува против Тиквеш во Кавадарци, во меч каде битолчани ќе сакаат триумф против екипа која во последните неколку години вложува сериозни финансии и сака да се наметне сериозно со цел да може конкурентно да се бори за излез и место во Европа.
Во новата сезона ќе се натпреваруваат 12 екипи, наместо 16 како лани, откако Ракометната федерација на Македонија се одлучи за драстично кратење на лигата.
Александар Ванев, Спортска Мрежа
