Актуелниот шампион Љуботен со убедливи 9:1 го декласираше Ас Јунајтед на домашен терен, во меч од 21. коло на Првата женска фудбалска лига.
Мариан Огочукву Охадиве постигнат четири гола за Љуботен, двапати погоди Александра Марковска, а по еден гол постигнаа Хава Мустафа, Настасја Накова и Ангелина Јованоска, додека пак за гостинот од Струга единствен стрелец беше Теодора Далческа.
Тиверија Брера на домашен терен со високи 9:0 го декласираше тимот на Речица кој немаше капацитет и можности воопшто да парира на теренот. Бразилката Тчеури Харуми Гоја постигна четири гола и со тоа се израмни на листата на најдобри стрелци со Хава Мустафа со по 25 гола и ќе конкурира за најдобар стрелец во ПЖФЛ.
Теона Галабовска постигна хет-трик, а пак по еден гол постигнаа Александра Теризски и Ане Бошеска.
Топ Гол го доби градското дерби во Битола откако со 0:2 славеше над Атлетико со погодоци постигнати во вториот дел. Во првото полувреме мрежите мируваа на „Павел Шатев“, па победникот се решаваше во вторите 45 минути.
Анастасиа Илиевска во 53. минута ја стресе мрежата на Атлетико за водство од 0:1. Неизвесноста околу трите бодови траеше во текот на самиот меч, а во 87. минута Мартина Сиљаноска капитулираше по вторпат на својот гол откако Ивана Милевска постигна гол за конечни 0:2.
Во Пржино беше постигнат еден гол откако Скопје со минимални 1:0 го доби Истатов со голот на Рабија Дервиши во 25. минута.
Слободна екипа во рамки на 21. коло беше Каменица Саса.
