Екипата на Радовиш, со резултат од 28:25 го доби натпреварот од последното коло на регуларниот дел од Супер лигата, откако на домашен терен триумфираше против Куманово.
Мечот започна со минута молк поради трагедијата во Кочани, а ракометарите на Радовиш се загреваа со црни маички на кои пишуваше Кочани и датумот 16 март 2025 година кога се случи големата трагедија.
Ова е втора победа во регуларниот дел за екипата на Радовиш, а прва победа за новиот тренер- Игор Котевски.
Куманово одлично го отвори натпреварот во СРЦ “25-ти Мај” откако имаше водство од 1:4, меѓутоа радовишани не дозволија противникот да се одлепи, па се вратија резултатски со тоа што најпрво израмнија, а потоа имаа и водство.
Во остатокот од натпреварот од првиот дел, се играше гол за гол и со често менување на резултатската предност, па така екипата на Куманово, на крај имаше предност 14:16 на полувреме.
Во вториот дел од натпреварот започна егал борба, игра гол за гол, резултатот постојано се менуваше, а Радовиш успеа да се одлепи во финишот од натпреварот и да има предност од еден до два гола, по што на крајот и го доби натпреварот со 28:25.
Најефикасен во Радовиш беше Ивица Илиев со седум погодоци, шест имаше Игор Кисељев, кај Куманово најдобар беше Давид Димевски, кој имаше десет погодоци.
