Денес конечно започна пролетната полусезона во Трета лига – Југозапад со натпреварите од 12. коло, откако двапати беше одложуван стартот на пролетниот дел.
Првиот пат поради промената на седиштето на ТМФЛ – Југозапад од ОФС Охрид во ОФС Битола, а вториот пат поради трагедијата во Кочани. Натпреварите започнаа со минута молк во чест на загинатите во големата трагедија во дискотеката во Кочани.
Во првото пролетно коло фаворитите се „сопнаа“, а мечот во Мешеишта меѓу Славеј и Велешта не се одигра. Како што е наведено во записникот од мечот натпреварот во Мешеишта не започна поради недоволен број на играчи кај гостинската екипа.
„Поради недоволен број на играчи на гостинската екипа натпреварот не започна. Пристуни беа 3 играчи (Агон Истрефи, Беким Бекси и Фартан Аних), се вели во делот за примедби на делегатот од официјалниот записник на мечот.
Фаворитот Кораб одигра само 1:1 против Демир Хисар на гостински терен, откако Фатјон Леши во 12. минута постигна гол за 0:1 од белата точка, а потоа голгетерот на домашниот тим Стефан Каревски погоди од белата точка за 1:1 на полувреме, а тоа воедно беше и конечниот резултат.
Димитар Кочески во 70. минута постигна гол за Света Троица со што охридскиот тим откина бодови од фаворитот Сатеска од Волино, откако двете екипи одиграа 1:1.
За гостинскиот тим стрелец на голот беше искусниот голгетер Никола Секулоски.
Караорман го доби градското дерби во Струга против Влазними со резултат од 1:2. Ланскиот второлигаш со голот на Ненад Балоски дојде до водство од 0:1 во 42. минута. Во Вториот дел Климент Филев погоди за 0:2, а во 80. минута Ахмет Белули ги постави конечните 1:2.
Реми од 1:1 на мечот меѓу Кравари и Евротип и поделба на бодовите. Гостинот преку Антонио Марцески дојде до водство од 0:1, а во вториот дел Мартин Ризовски ги постави конечните 1:1.
Екипата на Преспа од Ресен беше слободна, бидејќи екипата на Светлост од Кукуречани се откажа од натпреварување, како што веќе информираше Спортска Мрежа.
