Екипата на Каменица Саса вчера на стадионот „Кукуш“ во Турново ремизираше играјќи 1:1 против Кожуф, но по завршувањето на натпреварот екипата на Саса реагираше за голот на Кожуф, кој го постигна токму нивниот поранешен играч Сашо Дуков.
Како што се вели во реакцијата на клубот од Македонска Каменица, топката не ја поминала гол-линијата, а притоа бил признат голот на Дуков, со што Кожуф дојде до конечните 1:1 за делба на бодовите.
„ФК Каменица Саса изразува незадоволство од денешниот натпревар против ФК Кожуф, кој заврши со резултат 1:1. Во 90-та минута беше признат непостоечки гол за гостинската екипа, кога топката не ја помина гол-линијата, но судијата сепак досуди погодок, со што директно влијаеше на конечниот резултат. Оваа одлука предизвика оправдан револт кај нашиот тим и стручниот штаб. Како клуб, остануваме доследни на фер-плејот и спортските вредности, но воедно апелираме до надлежните да преземат мерки за спречување на вакви грешки во иднина, со цел зачувување на интегритетот на македонскиот фудбал“, велат од Каменица Саса.
- ПОГЛЕДНЕТЕ ГО ГОЛОТ НА ДУКОВ, ЗА КОЈ САСА ТВРДИ ДЕКА НЕ Е ПОМИНАТА ГОЛ ЛИНИЈАТА:
Саса уште еден меч ќе мора да игра на неутрален терен, а тоа ќе биде мечот со Брегалница, бидејќи Градскиот стадион во Македонска Каменица е суспендиран на два натпревари.
