Одбојкарскиот клуб Штип УГД забележа голема победа над актуелниот шампион Струмица и најавува пеколна борба за двојната титула.
Одбојкарот на Штип УГД и репрезентативец на Македонија, Костадин Ричлиев, за Спортска Мрежа вели дека неговата екипа со квалитетни тренинзи и максимално залагање може да го подигне квалитетот.
„Натпреварот со Струмица покажа дека нашиот тим ја игра нај атрактивната одбојка во првата одбојкарска лига на Македонија. Сепак, сметам дека тоа не е нашиот максимум и дека имаме капацитет со квалитетни тренинзи како до сега и со максимално залагање од целиот тим да го подигнеме нашиот квалитет на уште повисоко ниво и да ја нападнеме двојната титула“, изјави Ричлиев за Спортска Мрежа.
Ричлиев очекува поддршка и публика во спортската сала „Јордан Мијалков“ во Штип за натпреварот против Работнички.
„Следниот натпревар го играме против екипата на Работнички од Скопје, добра екипа со тројца нови играчи од странство. Верувам во добар и квалитетен меч и потврдување на нашиот квалитет и амбиции и трите бода остануваат во Штип. Благодарност до публиката која ни даваше поддршка и допатува во Струмица минатото коло, но сега играме на домашен терен и ја повикувам штипската јавност да дојде во голем број, да ја наполниме салата и заеднички да славиме“, додава Ричлиев.
Штип УГД е бранител на Куп титулата, а сезонава паралелно ќе ја напаѓа и титулата во лигата, односно штипјани сакаат да испишат историја со освојуање на двојната круна.
